Rom 5 | BEF | STEP | Lali Hu'mamofihi keheli ule'ale hutogo ai lele'mo bebe so'ehibe. Yana'mu Sipi Boti Yesu Kilisitou lalitoga hu'ehinanamu'i Hu'mau yatai lele'mo fulu nohibe.

Romans 5

Hu'mau bona'i enele'mo bebe so'ehina

1 Lali Hu'mamofihi keheli ule'ale hutogo ai lele'mo bebe so'ehibe. Yana'mu Sipi Boti Yesu Kilisitou lalitoga hu'ehinanamu'i Hu'mau yatai lele'mo fulu nohibe. 2 Yatai ya'ma fulunagu minoto keheli ule'ale huse'namofihi ai'a kapo li hokolo hu letago Hu'mamofihi lehe'mose'nagu ti'ohune. Ya'mu luto Hu'mamofihi fana mehenagu bilune luto bu mego'ohutana geba hu'ohuta legelo bito nohuto lilune. 3 To keta nohinauba lali'i huto hu letolenogo ana huto legelo bito minolata nohune. Hena'mube? Ya'ma keta nolebesinanauba lele'mo amuya melenogo mino lito bilune. 4 To lali amuya lekesa molo lito bilutaya Hu'mau kehelito laga besigo lali kumu fokehe lilibe. To lali kumu fokehe lilata'mu lali lekesa kehelito ai kumu geba huto minalube. 5 Ya'ma geba huto minaluta yanauba kehelise'nati le'mo laba mehilina'mu yabe. Hena'mugope? Hu'mamofihi Sikalafu'i limito lali komopatigu ho lifigo keke'i lu leto'ehinana huto hu baga i'ehina.

6 To lali amuya memolo'ohutaya Hu'mau mone kanagu lu kehelito Kilisito melugu ho lifito foipa boana'magihi fili epalalibe luto molo'ehina yupahi melugu limi'ehina. 7 To bati bo mone'mofito bo moneuba fili etenogo lali topa halune. Bati bo mone'mofihi bo moneuba fili etalifi mefili etalifi ya'ma keta huto'i ni'inaya ana huto mehilibe luto lali lekesa kehelilata nohune. 8 Lali foipana lito nominonogo Kilisitou lali kumu fili'ehina. Yana'mu Hu'mau sipi keke'i lu letoto lelepigo bu go'ohune. 9 To ai fililoto golaha'atu mina fi letoloto Hu'mamofihi bulo lele'mo bati bona'i lolo hu'ehibe. Ya huto'a mone'a hiti lehe'menogo lali foipanatimofihi nona'a meliluta'mu yabe. Hu'mamofihi hima muha'aguti lele'mo lubuto bilibe. 10 Koyapa'i Hu'mamofihi fateha'a lolo huto minota kana'agu ai'a pana'a fili'ehinauba fatehi huto minose'na li nohe'mito Hu'mau hiti lele'mo moneko koguna i'ehibe. Ya'mu luto yatai Hu'mau hiti koguna ito nohuta Hu'mau Kilisitohi le'mo kosaba hu'ehina'auba lali hiti lele'mo lubuto bilina'mu yabe. 11 To ya'ma anasigo meni'ibe. Yesu lali hiti Hu'ma hiti lele'mo hepito lalu'agita lolo hu'ehigo ya'mu luto lali sipi legelo nobune.

Atahi hapa'a yagi Yesuhi hapa'a yabe

12 Yata'a kanaguti bo moneuba Atau nohuto foipana li huto hu'ehina. Ya hu'ehigo filise'nauba ma melugu huto hu'ehina. To ya higo yege yege bona'magitoga foipana huto higo filise'nauba ananamu'i tili tele higo analo bona'i fililata nehabe. 13 Yata'a asaga melugu bona'magihi foipa faipana hi'ahana. Alihi Hu'mau keya ka lu molo'ehina. To kohe toto keya ka lu meepina kanagu Hu'mau foipana'ani leka meso'ehibe. 14 To Atau melugu minana kanagu bigo Moseu huto hu'ehina kanagu filise'nauba melugu bona'i asaga'i kaba hu epolo'ehina yabe. Atau Hu'mamofihi kaga mekehelise kegeiyo hu'ehigo filise'nauba kaba hu eto'ehinaya to ana huto enali Atahi suhi mehi'ahana bona'magihi kaba hu epolo'ehina yabe.

To Atau ai aliha'a alina bomofihi meha'a legi huto mino'ehibe. Ana bo Yesu yabe. 15 To etali moneko babeyafa bomale'i meneha'ibe. Hu'mau foipanati he'mi letoto lehe'malina hapa'auba Atahi foipana be ligi'ehina. Ya'ma bo Atau, foipana lilata hu'ehina ya'mu babu bona'i foipana lite fili'ahana. Aku'i Hu'mamofihi lehe'mose'nauba ya'ma foipanamofihi hapa'a abe ligi'ehina yabe. Ai bo'a moneko'isi nohina lalitoga fa'mene limi'ehina ana bo Yesu Kilisito yabe. Ai'a lehe'mose'nauba bona'magita lele'mo bati hu'ehina yabe. 16 To Hu'mau fa'mene lehe'mose'na hiti to ana bouba foipana'a hu'ehinana hiti moneko babeyafa huto meni'ibe. Atau moneko kumu foipana hu'ehigo Hu'mau enifisa ito fililabe luto lu'ehinaya aku'i yatai bona'i foipan'ani babu luto hi'ahanamu'i enifisa meise, bati bona'i nehabe luto foipana'ani li he'mi epolo'ehina yabe. 17 To moneko bo Atau foipana li huto hu'ehigo filise'nauba asaga bona'magihi kaba bo'ani lolo huto naga'i epi'ehina. To bo moneuba Yesu Kilisitou hu leto'ehinanauba filise'namofihi be ligi'ehinagihe. Asaga bona'magi Hu'mamofihi enehe'mose'na hiti to ai'a fa'mene enele'mo bati huse'na hiti komopa'anigu lilana bona'magi mineba mineba hilana Kilisitohi kapogu kaba bona'i lolo hilabe.

18 To bo monekomofihi foipana'auba asaga boana'i enifisa ito ka foyagu enele'mo molo'ehinagihe. To ana huto bo monekomofihi ya'ma Kilisito bebe sose suhi hu'ehinanauba asaga bona'i filise'namofihi nagaluguti gulu ho epoloto mino kosaba huse'na fa'mene epilata nohinagihe. 19 To mone bo Atau pelesa ito Hu'mamofitoga agoya hu meemigo foipa bona'magi babu lite huto hi'ahana to ana suhi huto mone bouba Yesu Hu'mamofitoga agoya hu emigo bebe sose bona'i babu lite huto hilanagihe.

20 Hu'mau bona'i foipana'ani ni'igo bu goloto enelepilube luto keya ka lu epi'ehina. Ya keya kauba huto hu'ehigo foipana'ani samahi tito hu'ehibe. To foipana'ani babu luto huto hu'ehigo Hu'mau enehe'mose'na sipi'a mone hiti li huto higo be ligi'ehina yabe. 21 To foipana'aniuba asaga bona'i kaba hu epolo'ehigo filise'namofihi nagalugu mine'ahana. To Hu'mau lehe'mose'nauba kaba hu letolenogo Sipi Boti Yesu Kilisitou Hu'mamofihi kapogu lelepito buto mino kosaba huse hepato lele'mo mololata nohibe.